ވައިގަދަ ދުވަހެއްގައި ދުންފަތުގެ އިސްތިޢުމާލު ކުރަމުންދާއިރު ގާތްގަނޑަކަށް ފަންސާސް ފޫޓް ސަރަޙައްދަށް ދުންފަތުގެ ދުމުގެ ނުރައްކާ ފެތުރޭނެއެވެ.

 

އޮފީސްތަކުގެ ބޭރާއި، ފިހާރަތައް އަދި ކެފޭ ފަދަ ތަންތަނުގެ ބޭރުން ދަތުރުކުރަމުންދާއިރު ދުންފަތުގެ އިސްތިޢުމާލުނުކުރާ މީހާގެ ރައްކާތެރިކަމާމެދު ވިސްނާލަމާ ހިނގާށެވެ. މި ކުޑަކުޑަ ރާއްޖޭގައި ކުޑަކުއްޖަކަސް ބޮޑުމީހަކަސް ދުންފަތުގެ އިސްތިޢުމާލު ނުކުރާ މީހަކަށް މި ނުރައްކާތެރި ދުމުން ރައްކާތެރިކަން ލިބިފައިވާ މީހަކު ވޭތޯއެވެ؟ ސަތޭކަ ޕަސެންޓް މީހުންނަކީ ދުންފަތާއި ގުޅުންހުރި ނުރައްކާތެރި ކެންސަރު ޖެހުމުގެ ފުރުސަތު ބޮޑުބައެކެވެ. ރާއްޖޭގައި ދުންފަތުގެ އިސްތިޢުމާލު އެއްގޮތަކަށް ނުކުރާ މީހާއަށް ކެންސަރު ޖެހުނަސް އެއީ ދުންފާތާއި ގުޅުން ނެތް މީހެކޭ ބުނެވޭކަށް ނޯންނާނެއެވެ. ދުންފަތުގެ އިސްތިޢުމާލު ނުކުރެވޭ ތަންތަނުގައި ދިރިއުޅުމުން ދުންފަތުގެ ނުރައްކަލުން މިންޖުވީކަމަށް ހީކުރަމު ހެއްޔެވެ؟

 

މުޅިން އެހެން ވާހަކައެކެވެ. އަނެއްކާވެސް ނުރައްކާތެރި އިންޒާރެކެވެ. “ތާރޑް ހޭންޑް” ސްމޯކިންގެ ވާހަކަ އަޑުއެއްސެވިންތޯއެވެ. ދުންފަތުގެ އިސްތިޢުމާލު ކުރުމުން އޭގެ ދުން އަނެކާއަށް ވާސިލް ވުމަކީ ސެކަންޑް ހޭންޑް ސްމޯކިންއެވެ. ދުންފަތުގެ ދުމުގައި ހުންނަ ނުރައްކާތެރި ބައެއް މާއްދާތައް ހެދުމުގައާއި އިސްތަށިގަނޑުގައި، ބެންޗުތަކުގައާއި ގޮނޑީގައި ނުވަތަ ފާރާއި ވެލިގަނޑުގައި ހަރުލާފައި ހުރެއެވެ. މި މާއްދާތައް ފަހުން އެކްޓިވޭޓްވެއެވެ. އަދި ވައިގެ ތެރޭގައި ދައުރުވެއެވެ. ވިސްނާލަމާ ހިނގާށެވެ. ގެއިން ބޭރުގައި ސިނގިރޭޓެއް ބުއިމަށްފަހު ގެއަށްވަދެ ގޭގެ މާހައުލުގައި މި ދެންނެވި މާއްދާތައް އެކްޓިވޭޓް ވެ ގޭތެރޭގެ ވައި ނުސާފުވެ ދަރިންނާއި އެހެންމީހުން އެވައި ބޭނުން ކުރުމުން އެމީހުންނަށް ނުރައްކަލެއްވާނެތޯއެވެ؟ މިއީ “ތާރޑް ހޭންޑް” ސްމޯކިންގގެ ވާހަކައެވެ. އޮފީސްތަކުގައި މަސައްކަތްކުރާ ސިނގިރޭޓް ބޯ މީހުން 30 މިނެޓުން 30 މިނެޓުން އޮފީހުން ނުކުންނާނެއެވެ. އެއީ ސިނގިރޭޓެއް ބޯލުމަށެވެ. މިފަދަ މީހުން ސިނގިރޭޓުގެ ވަސް ނުދުވާ ގޮތަށް ފާޑުފާޑުގެ ސެންޓު ބޭނުންކޮށްގެން ނަމަވެސް އަނެއްކާ އޮފީހަށް ވަދެއެވެ. ވިސްނާލަމާ ހިނގާށެވެ. ރައްކާތެރި ގޮތްތަކެއްވޭތޯއެވެ.

ދުންފަތުގެ އިސްތިޢުމާލުކުރުމުން ގެއްލުން ލިބެނީ މުޅި އާއިލާއަށްކަން ދައްކައިދޭ ފޮޓޯއެއް

އިންސާނުންނަށް “ތާރޑް ހޭންޑް” ސްމޯކިންގގެ އަސަރު ތިން ގޮތަކަށް ކޮށްފާނެއެވެ. އެއީ ވައިގެ ޒަރީއާއިންނާއި، ހަމުގައި ބީހިގެން ނުވަތަ ކެވިގެންނެވެ. މި މާއްދާތައް ބިމާއި ތަޅުމުގައި ނުވަތަ ކާޕެޓްގައި ހަރުލާފައި ހުންނައިރު ތިބާގެ ފިރުކޭ ޢުމުރުގެ ކުޑަދަރިފުޅަށް މީގެ އަސަރު ނުކުރާނެހެއްޔެވެ؟ ވިސްނާލަމާ ހިނގާށެވެ! ދުންފަތުގެ އިސްތިޢުމާލު ކުރާބަޔަކު ދިރިއުޅޭ ކޮޓަރިއެއް ހުސްކޮށް އޭގެ ދެ މަސްފަހުން ކާޕެޓު ބަދަލުކޮށް ކުލަ އާކުރުމަށްފަހު ވެސް މޫސުމަށް އަންނަ ބަދަލާއި ކޮޓަރީގެ ފިނިހޫނު މިނަށް އަންނަ ބަދަލާއެކު ދޭތެރެ ދޭތެރެއިން ކެމިކަލްތައް ރީއެކްޓިވޭޓްވެ (އަލުން ހަރަކާތްތެރިވެ) ދުންފަތުގެ އަސަރު ގިނަ މުއްދަތަކަށް ހުންނަކަން 2010ގެ ހޯދުމަކުން ދައްކާފައިވެއެވެ.

 

މި އާޓިކަލް ވީހާވެސް ކުރުކޮށްލުމުގެ ގޮތުން އިތުރު ހޯދުންތައް ހިމަނާފައެއް ނުވާނެއެވެ. ނަމަވެސް ތިމާ ފުރިހަމަ ސިއްހަތެއްގައި ހުރުމަށްޓަކައި ދުންފަތާއި ދުރުހެލިވުމާއި ދުންފަތުގެ އިސްތިޢުމާލުކުރާ މީހުން އެކަން ހުއްޓާލުމަށް ބާރު އަޅަންޖެހޭ މިންވަރު އިހްސާސް ކުރެވޭނެކަމަށް ހީކުރަމެވެ. ރައްކާތެރިކަން އޮތީ ދުންފަތާއި މުޅިން ދުރުވެފައިއޮތް މުޖުތައެއްގައި ދިރިއުޅެވިގެންނެވެ. ދުންފަތާއި ގުޅުންހުރި މަޢުލޫމާތު ހޯއްދެވުމަށް https://www.facebook.com/TobaccoFreeMaldives/ ޚިޔާރުކުރެއްވުމަކީ އެދޭ އެދުމެކެވެ.

ލިޔުންތެރިޔާގެ ފުރަމަލަ

އަޙްމަދު ޒާހިދު
އަހުމަދު ޒާހިދު އަކީ ށ.ފުނަދޫ އަތޮޅު ހޮސްޕިޓަލް ކޮމިއުނިޓީ ހެލްތު އޮފިސަރެކެވެ. ޒާހިދަކީ ޞިއްޙީ ދާއިރާގެ އެކިއެކި މައުޟޫތަކަށް ލިޔުއްވަމުން ގެންދަވާ ލިޔުންތެރިއެކެވެ.
މި ލިޔުންތެރިޔާގެ ބައެއް އެހެން ލިޔުންތައް

ގުޅުންހުރި ލިޔުން: