| MUNIAVAS

2008 ވަނަ އަހަރުގެ ސާފު ޗެމްޕިއަންޝިޕް މުބާރާތުގެ ފައިނަލްގައި އިންޑިޔާ އާއި ވާދަކޮށް ދިވެހިރާއްޖޭގެ ޤައުމީ ޓީމުން 2 ލަނޑު ޖަހައި މި ސަރަޙައްދުގައި ކުޅެވޭ އެންމެ ބޮޑު ފުޓްބޯޅަ މުބާރާތުގެ ތަށި ހޯދިއެވެ. އޭގެ 10 އަހަރު ފަހުން އަނެއްކާވެސް ރާއްޖޭގެ ޤައުމީ ޓީމުން މިވަނީ އިންޑިޔާ ޓީމާއި ބައްދަލުކޮށް 2 ލަނޑު 1 ލަނޑުން، ދިވެހިރާއްޖެއަށް ތަށި ހޯދައިދީފައެވެ.

ދިވެހި ޤައުމީ ފުޓްބޯޅަ ޓީމުން މި މުބާރާތުގެ ޗެމްޕިއަންކަން ހޯދުމާއިއެކު ދިވެހި ކޮންމެ ފަރުދެއްގެ ހިތުގައި ޖަހަމުންދިޔަ ޤައުމީ ވިންދާއި ޤައުމީ ލޭ ކެކިގެންދިޔައީ ފިސާރި ޤައުމީ ރޫހެއްގައެވެ. އޭރުވެސް އަދި މިހާރުވެސް ކަން އޮތީ ހަމަ މި ބީދައިންނެވެ. ކޮންމެ ދިވެއްސެއްގެ ދުލުން ކިޔަމުންދަނީ އެއް ތަރާނާއެކެވެ. އާދެ، “ކުޅެ ފިސާރި ޖޯޝުގާ ދިވެހިން މޮޅުވެއްޖެޔޯ! ….. މަރުޙަބާ! މަރުޙަބާ! ޤައުމީ ޓީމަށް މަރުޙަބާ!” މިހެންނެވެ.

2008 ވަނަ އަހަރު ދިވެހި ޓީމު ހޯދި ކާމިޔާބީ ފާހަގަކޮށް އެތަކެއް ލަވަތަކެއް އުފަންވެގެން އައެވެ. އެ ހުރިހައި ލަވަތަކުގެ ތެރެއިން ދިވެހިންގެ ލޭ އެންމެ ބޮޑަށް ކައްކުވާލައި، ރަސްމީ އަދި ޤައުމީ ލަވައެއްގެ ގޮތުން ފާހަގަވެގެން ދިޔައީ އަލްފާޟިލް ޢަބްދުއްރަޝީދު ޙުސައިން، ބަންގްލަދޭޝް ލަވައެއްގެ ރާގަށް ހެއްދެވި އަސަރާއި ޖޯޝުން ފުރިގެންވާ ޅެންވެރިކަމުގެ އަލްފާޒު ތަކެއް ހިމެނޭ ލަވައެކެވެ. “ކުޅެ ފިސާރި ޖޯޝުގާ ދިވެހިން މޮޅުވެއްޖެޔޯ! ….. މަރުޙަބާ! މަރުޙަބާ! ޤައުމީ ޓީމަށް މަރުޙަބާ!” މި ލަވައެވެ.

ޙުސައިން ޞަބާހް ގެ މޫސީޤީ ހުނަރާއި އެކު މިއުޒިކު ހަދާފައިވާ މި ލަވައިގެ ޅެންވެރިކަމާއި ލަވައިގެ ވީޑިއޯ އެއް މިފުރުޞަތުގައި ހިމަނާލާނަމެވެ. ދިވެހި ޤައުމީ ޓީމު ހޯދި މި ޝަރަފުވެރި މަޤާމުގެ ކާމިޔާބީގައި ހިއްސާވެލުމަށެވެ. ދިވެހި ޤައުމީ ލޭ ކެކިފައިވާތީ އެވެ.

ކުޅެ ފިސާރި ޖޯޝުގާ ދިވެހިން މޮޅުވެއްޖެޔޯ! ….. މަރުޙަބާ! މަރުޙަބާ! ޤައުމީ ޓީމަށް މަރުޙަބާ!

ދިވެހި ސަޕޯޓަރުންގެ ފަރާތުން ޤައުމީ ޓީމަށް އައްސަރިބަހާ ސާބަހޯ….. މޯލްޑިވްސް ހޭ! މޯލްޑިވްސް ހޭ!

ކުޅެ ފިސާރި ޖޯޝުގާ

ކުޅެ ފިސާރި ޖޯޝުގާ ދިވެހިން މޮޅުވެއްޖެޔޯ!