ނިމިގެން ދިޔަ 2018 ވަނަ އަހަރަކީ ދިވެހި ސިނަމާއަށް ބަނަ އަހަރެކޭ ދެންނެވުން ދޮގަކަށް ނުވާނެ އެވެ. މުޅި އަހަރު އެއްކޮށް ކަހަލަ ގޮތަކަށް ވޭތުވީ ދިވެހި ސިނަމާއަށް ވަރަށް ފަޅު އަހެރެއްގެ ގޮތުގައެވެ. އަހަރު ނިމިގެން ދިޔައީ އެންމެ ފަސް ފިލްމު ރިލީޒްވެގެން ނެވެ.

 

ނިމިދިޔަ އަހަރު ސިނަމާ އަށް އައިސްފައިވާ ދިވެހި ފީޗާ ފިލްމުތަކަކީ “ދެވަންސޫރަ”، “ވަކިން ލޯބިން”، “ރޭވުމުން” އަދި “ތިޔަ ލޯތްބާ ދުރަށް” މި ހަތަރު ފިލްމެވެ.  މީގެ އިތުރުން އަހަރު ނިމެން ކައިރިވެފައިވަނިކޮށް ފަސްވަނަ ފިލްމެއްގެ ގޮތުގައި ރިލީޒްވި ފިލްމަކީ އެނިމޭޑެޓް ދިވެހި ފިލްމު “ބަގީޗާ” އެވެ.

 

“ދެވަންސޫރަ” އަކީ ސަސްޕެންސް ތްރިލާ އެކެވެ. މަޝްހޫރު ސްކްރީން ރައިޓަރ އަދި އެހާމެ ކުޅަދާނަ ޑައިރެކްޓަރ ފިލްމީ ތަރި ޔޫސުފް ޝަފީޢު (ޔޫއްޕެ) ލިޔެ ޑައިރެކްޓްކޮށް އަދި ފިލްމުގެ ފިރިހެން ލީޑް ވެސް ކުޅެފައިވާ މޮޅު ފިލްމެކެވެ. ފިލްމު އަލިއަޅުވާލެވިފައި ވަނީ ފިލްމުގެ ލީޑުން ފިލްމީ ދާއިރާއަށް އަލަށް ތަޢާރަފް ކޮށްފައިވާ މަރިޔަމް ޝިފާ ނުވަތަ ފިލްމުގައި ސިޔާދާ ގެ މަރުގެ ޙަޤީޤަތް ހޯދުމަށް ފުލުހުން ހިންގާ ތަހްޤީގެއްގެ މައްޗަށެވެ. އަދި ފިލްމުގެ ނަމުގައިި ބުނެފައިވާ ފަދައިން ޔޫއްޕެ ގެ ދެވަންސޫރައެއް (ދެވަނަ ސިފައެއް) ދައްކުވައިދީފައި ވެއެވެ.

 

“ވަކިން ލޯބިން” އަކީ ރަނގަޅަށް ދަސްނުވެ، ކައިވެނިކުރާ ޒުވާން ދެމަފިރިއަކަށް ދަރިއަކު ވެސް ލިބޭ ފަހުން ވަރިފަށަށް އެރުމުން ދިމާވާ ބޮޑު ހާދިސާއެއް ކިޔައިދޭ ފިލްމެކެވެ. ފިލްމުގައި ގިނަ ޓްވިސްޓް ތަކެއް ފެނިގެންދެއެވެ. ފިލްމުގެ ލީޑް ކުޅެފައިވަނީ ޖުމައްޔިލް ނިމާލް (ޖުމަލް) އާއި މަރިޔަމް މަޖުދާ (މަޖޫ) ގެ އިތުރުން ނުޒުހަތު ޝުއައިބު (ނުޒޫ) އެވެ. މިއީ ޑާކް ރެއިން އެންޓަޓައިންމަންޓުގެ އެންމެ މަޤްބޫލު ކާސްޓު ހިމަނައިގެން ކުޅެފައިވާ ލޯބީގެ ފިލްމެކެވެ.

 

“ރޭވުމުން” އަކީ މިހައިތަނަށް ރާއްޖޭގައި އެންމެ ގިނަ ފިލްމު ޑައިރެކްޓްކޮށްފައިވާ ޑައިރެކްޓަރ އަމްޖަދު އިބްރާހިމް (އަމްޖޭ)ގެ 52 ވަނަ ފިލްމެވެ. އަމްޖޭ ގެ އަމިއްލަ ސްކްރީންޕްލޭ އަކަށް ހަދާފައިވާ “ރޭވުމުން” ގެ ލީޑް ރޯލް ކުޅެފައި ވަނީ މުހައްމަދު މަނިކާއި އަލަށް ތައާރަފުވާ ނާޖިހާ (ނާޖި) އެވެ. ފިލްމްގެ ކާސްޓުންގެ ތެރޭގައި ފައުޒިއްޔާ ހަސަން، އަހުމަދު (ތަބޫޖެ) ޝާޒް އަދި މަރިޔަމް ޝަކީލާ، ހަސަން (ރޯނު) މަނިކް އަދި ނާޝިދާ ފަދަ ތަރިން ހިމެނެ އެވެ. މިއީ ލޯބީގެ ބިރުވެރި ހާދިސާތަކެއް ދައްކައިދޭ ފިލްމެކެވެ.

 

“ތިޔަ ލޯތްބާ ދުރަށް” އަކީ މަޝްހޫރު ވާހަކަ ލިޔުންތެރިޔާ މަރިޔަމް މޫސާ (މަރީ) އަލަށް  ޑައިރެކްޝަން ހަދާފައިވާ ފިލްމެވެ. ސްރީ ލަންކާގައި ޝޫޓްކޮށްފައިވާ ފިލްމުގައި ލީޑް ކުޅެފައިވަނީ އަހުމަދު އަޒްމީލް (އަޒޭ) އާއި މަލީހާ ވަހީދު (މަލް) އެވެ. މީގެ އިތުރުން އަހުމަދު އަމަން (ޓޮމް) އާއި އޭނާގެ އަންހެނުން އަދި ބަތަލާ މަރިޔަމް ޝަހްޒާ ވެސް ފެނިގެންދެއެވެ. އަދި އަދި ލަންކާ ފިލްމީތަރި އުދޭނީ ވެސް މި ފިލްމުގައި ބައެއް ކުޅެފައިވެއެވެ.

 

“ބަގީޗާ” އަކީ ރާއްޖޭގެ ފުރަތަމަ އެނިމޭޓެޑް ފީޗާ ފިލްމެވެ. މިއީ ރާއްޖޭގައި އެނިމޭޓެޑް ފިލްމު އުފެއްދުމުގެ މަސައްކަތުގެ އެންމެ އުހުގައި ހަރަކާތްތެރިވަމުން އަންނަ ސެލްމިން ސްޓޫޑިއޯގެ އުފެއްދުމެކެވެ. ފިލްމުން ދައްކައިދެނީ ހަތަރު ކުކުޅަކާ އިނދެގެން އުޅޭ ހާލަކާއި އެ އެއްޗެހީގެ ޝައުގުވެރި ދިރިއުޅުމުގެ ވާހަކަ އެވެ. ނުވަތަ އެކަކަށް ވުރެ ގިނަ މީހުންނާ އިނދެގެން އުޅޭ ފިރިހެނެއްގެ ވާހަކަ މަޖާ ގޮތަކަށް ކިޔައިދޭ ފިލްމެކެވެ.

 

2018 ވަނަ އަހަރު ފެށިގެން އައީ 2017 އަށް ވުރެ ގިނަ ފިލްމުތައް ރިލީޒް ވާނެ އަހަރަކަށް ވާނެ ކަމުގެ އުންމީދާ އެކުގަ އެވެ. ނަމަވެސް، ފާއިތުވި ތިން އަހަރަށް ބަލާއިރު، މިދިޔަ އަހަރަކީ އެންމެ މަދުން ސިނަމާ އަށް ފިލްމުތައް އައި އަހަރެވެ. 2017 ވަނަ އަހަރު ޖުމްލަ 8 ފިލްމް ރިލީޒް ކުރި އެވެ. ރާއްޖޭގެ ނިސްބަތުން ފިލްމު އުފައްދާ ގިނަ ޕްރޮޑަކްޝަން ހައުސްތަކެއް ހުރިނަމަވެސް  2017 ނިމިދިޔައީ ވެސް ސިނަމާތައް ހުސްހަށިބައިވެ އެކަނިވެރިކޮށްފަ އެވެ.

 

2018 ވަނަ އަހަރުގެ މެދު ތެރޭ ސިނަމާ އޮތީ މުޅިން ހުހަށެވެ. މީގެ އިތުރުން، ނޮވެމްބަރު މަހާއި ޑިސެމްބަރު މަހު އޮލިމްޕަހުގައި ގިނައިން އެޅުވީ މީގެ ކުރިން އެތައް ފަހަރަކު އަޅުވާފައިވާ ކުރީގެ ފިލްމުތަކެވެ. އާ ފިލްމެއް ބެލުންތެރިންނަށް ނުފެނުނު އިރު، އަހަރުގެ ކުރީކޮޅު ނެރުނު ފިލްމުތަކަށް ވެސް މާބޮޑު ތަރުހީބެއް ނުލިބުނެވެ.

 

ނިމިދިޔަ އަހަރު ދިވެހި ސިނަމާގެ ތައް ހުސްކަމެއްގެ ތެރޭގައި އޮންނަން ޖެހުނު އެއް ސަބަބަކީ ސިޔާސީ ހަމަނުޖެހުން ބޮޑުވުމެވެ. ސިޔާސީ ހަމަނުޖެހުން ކޮންމެވެސް ވަރަކަށް ނަމަވެސް މައިތިރި އަތަށް އަޅައިލާ އެއް ކަންތައް ކަމަށްވާ ރިޔާސީ އިންތިހާބު އޮތުމެވެ. މި ސަބަބުތަކާހުރެ ސިޔާސީ ކަންކަމަށް ގިނަ ބައެއްގެ ސަމާލުކަން ހުއްޓި މުނިއަވަސްފިލުވުމަށް ދެވުނު ސަމާލުކަން ކުޑަވެގެން ދިޔައީ ކަމަށްވެސް ވެދާނެ އެވެ.

 

ސިޔާސީ ގޮތުން ހަލަބޮލި ދުވަސްވަރެއް ނަމަ ފިލްމުތައް ސިނަމާ އަށް ގެންނަން ޕްރޮޑިއުސަރުންނާއި ޑައިރެކްޓަރުން ޖެހިލުން ވެސް ވެއެވެ. ސަބަބަކީ ބޮޑު ޚަރަދުކޮށްފައި ހަދާ ފިލްމުތަކަށް ކުރާ ބޮޑު ޚަރަދު ވެސް ފޫނުބެއްދޭނެތީ އެވެ. އެތަކެއް ސަބަބުތަކަކާއި ހުރެ 2018 ވަނަ އަހަރަކީ ޔަގީނުން ވެސް ފިލްމީ ދާއިރާ އަށް ވަރަށް ވެސް ވަނދު އަހަރެކެވެ. ސިނަމާތަކަށް ބަނަ އަހަރެކެވެ.

 

2018 ވަނަ އަހަރަށް ތާވަލު ކުރި ބައެއް ފިލްމުތައް މި އަހަރަށް ފަސްކުރި މައިގަނޑު ސަބަބަކީ ވެސް ކުރިން މި ދަންނަވައިލެވުނީ އެވެ. މިދިޔަ އަހަރު ބާއްވަން ނިންމި ނުވަ ވަނަ ދިވެހި ފިލްމު އެވޯޑްސް ކެންސަލްކުރެވިގެން ދިއުންވެސް އެއީ ދިވެހި ސިނަމާއަށް އައި ބަނަކަމެކެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: