ދުވަސްތައް ފާއިތުވަމުންގޮސް ހަފުތާތައް ފާއިތުވެ، ދެތިން މަސް ފާއިތުވެގެން ހިނގައްޖެއެވެ. ލިބުނު ސިހުން ބޮޑުކަމުން އަހަރެން އޮތީ ކޯމާއެއްގައެވެ. ހޭވެރިކަންވިއިރު، އަހަރެންގެ ވަށައިގެން އާއިލީ މީހުންނާއި، އޮފީސް މުވައްޒަފުން ތިބިއެވެ. ކައިރީގައި އިނީ ބޮޑުދައިތައެވެ.

” ބޮޑުދައިތާ، ކިހާ ދުވަހެއް ވެއްޖެތަ؟” އަހަރެން އަހާލީމެވެ.

“ދަރިފުޅާ، ދެތިން މަސް ފާއިތުވެގެން ހިނގައްޖެ. ޖިނާ އަހަރުމެންނަށް ވަނީ ހުރިހާ އެއްޗެއް ކިޔާދީފަ”. ޑޮކްޓަރަށް ބަލާލައިފާ ޖަވާބުދިނެވެ.

ޑޮކްޓަރ އަހަންނަށް ގޮވާލުމުން އަހަރެން ޑޮކްޓަރާ ދިމާލަށް ބަލާލީމެވެ.

“ސަމާ، މިއަދު އަހަރުމެން ވަރަށް އުފާވެއްޖެ އެތަކެއް ދުވަހެއް ފަހުން ސަމާ އޮތް ކޯމާއިން ނިކުމެވުނީމަ. ކޮންމެ ދުވަހަކު އަހަރެން ސަމާގެ ޗެކަޕަށް އަންނައިރު، މިގޭ މީހުން މާޔޫސް ކަމުގެ ދާންޏަކަށް ވެއްޓިފައި ތިބޭތަން އަހަންނަށް ފެނޭ، ސަމާ ތިއީ މިގޭ މީހުންގެ ލޮލުގެ ނޫރު. މިވާހަކަ ބާއްވަމާދޯ ފަހަށް. ސަމާގެ ހާލު މިވަގުތަށް ރަނގަޅު. އެކަމަކު ތިއީ ކުޑައިރުން ފެށިގެން އެސްތްމަޓިކް ޕޭޝަންޓަކަށް ވުމުން، މިހާރު ސަމާގެ ކޮންޑިޝަން ވަރަށް ސީރިއަސް. މިހާރު ތިހުރީ ސިވިއަރ އެސްތްމާ ޖެހިފަ. އެއީ އެންމެ ނުރައްކާތެރި ހާލަތު!”. ޑޮކްޓަރ އެހެން ބުނުމުން މުޅި ކޮޓަރި ތެރެއަށް ހަމަހިމޭންކަން ވެރިވިއެވެ. އެކަކު އަނެކަކަށް ބަލާލިއެވެ.

ބޮޑުދައިތަ، ކާފައަށް މިޚަބަރު ދިނުމުން ކާފަގެ މަސައްކަތް ހުއްޓާފައި ހަމަ ވަގުތުންވަގުތަށް ކާފަ ހޮސްޕިޓަލަށް އައެވެ. ޑޮކްޓަރާ ބައްދަލުކޮށް ސުވާލުކުރިއެވެ.

“ޑޮކްޓަރ ދެން ކީއްތޯ އަޅުގަނޑުމެންނަށް ކުރެވޭނީ؟ އެއްވެސް ގޮތެއް އެބައޮތްތޯ؟ އަހަރެންގެ މަންޖެއަކީ އަހަރެންގެ ލޮލުގެ ނޫރު. އެ ނޫރު ގެއްލިގެން ދާކަށް އަހަރެން ބޭނުމެއް ނޫން.” އިންތިހާ މާޔޫސީ ހާލުގައި ކާފަ ވާހަކަދެއްކިއެވެ.

“އޮޕްޝަނެއް އެބައޮތް. އެކަމަކު ސަމާ ގަބޫލުވާންޖެހޭނެ.” ޑޮކްޓަރ ވަރަށް ވިސްނާލާފައި ބުންޏެވެ.

“އެއީ ކޮން ގޮތެއް. އަހަރެންގެ ފީލިންގސްއާ ކުޅުނު މިހާއާއި ކައިވެނި ކުރުންތަ؟ ސޮރީ ޑޮކްޓަރ. ތިކަމެއް ނުވާނެ!” އަހަރެން ބުނީމެވެ.

ދެތިންދުވަސް ފަހެވެ. ޑޮކްޓަރު ކުރީދުވަހު ބުނި އެއްޗަކާ ދޭތެރޭ ވިސްނާލީމެވެ. އަހަރެންގެ ފޯނު ނަގާފައި އަބްޔާޒުގެ ނަންބަރަށް ޑައިލް ކޮށްލީމެވެ. ވަގުތުން ގުޅިއްޖެއެވެ.
“މިއަދު ހަވީރު 4:30 ހާއިރު ސިޓްރޯން ރެސްޓޯރެންޓަށް އައިސް އަހަންނާ ބައްދަލު ކުރެވިދާނެތަ؟ ހީނުކުރައްޗޭ އަހަރެން މާފު ކުރީއޭ. ނުކުރަން. އަހަރެން މިބައްދަލު ކުރަނީ އާއިލާގެ އުފަލަށްޓަކައި. ސީ ޔޫ ދެއާ.” މިހެން ބުނެފައި އަބްޔާޒުއަށް އެއްޗެކޭ ނުބުނެވެނީސް އަހަރެން ފޯނު ކަނޑާލީމެވެ.

ހަވީރުހަތަރު ގަޑިބައި ވަނީއެވެ. އަހަރެމެން ދެމީހުންގެ އޯޑަރ ނެގުމަށްފަހު ސިޓްރޯންގެ ސީވިއުގައި އަހަރެން އޭނަގެ އިންތިޒާރުގައި އިނީމެވެ. އަބްޔާޒު އައިސް އިށީންނުމާއެކު އަހަރެންނަށް ޑޮކްޓަރ ހަވާލުކޮށްފައިވާ އަހަރެންގެ ރިޕޯޓުތައް ދިނީމެވެ.

“އަހަރެން މިތަނަށް މިއައީ މާ ގިނަ ވާހަކަތަކެއް ދައްކާކަށެއް ނޫން. ސީދާ މެއިން ޕޮއިންޓަށް އަހަރެން ދާނީ. އަބްޔާޒު މެން ހީކުރީތަ ވޭތުވެދިޔަ ދެތިން މަސް ތެރޭގައި އަހަރެން އުޅުނީ އުފަލުންނޭ. ނޫން ތިއީ ކަލޭމެން ހީކުރާގޮތް. ތިއޮތީ ފެންނަން. އަހަންނަކީ އެސްމަޓިކް ޕޭޝަންޓެއް. އެދުވަހު ލިބުނު ޝޮކް ބޮޑުކަމުން އަހަރެންގެ ކޮންޑިޝަން ގޯސްވީ. ދެން ޖެހުނީ އެންމެ ނުރައްކާ ވައްތަރު. އެއީ ސިވިއަރ އެސްތްމާ. އަހަންނަކީ ދުނިޔޭގައި ކުޑަ ދުވަސް ކޮޅެއްގެ މެހުމާނެއް. އަހަރެން ސަލާމަތްކުރަން ޑޮކްޓަރު އެޑްވައިސް ކުރީ އެންމެ އޮޕްޝަނެއް. އެއީ އަބްޔާޒު އަހަންނާ މެރީ ކުރުން. މިނޫން ގޮތެއް ނެތް.”

އަބްޔާޒު ހުރީ ބުނާނެ އެއްޗެއް ނޭނގިފައެވެ. ހީވީ އޭނާގެ ގޮނޑިކައިރިން ބިންގަނޑު އަޑިޔަށް ދިޔަހެންނެވެ. އޭނާގެ ލޮލުން މާޔޫސްކަމާއި އަމިއްލަ ނަފުސު ކުށްވެރިވެއްޖެކަން ފެންނަން ހުއްޓެވެ.

ގޮޑިން ތެދުވެ ދެ ކަކޫ މައްޗަށް އަބްޔާޒަށް އިށީންދެވުނީ ބޭއިޚްތިޔާރުގައެވެ. އޭރު އޭނާގެ ދެލޮލުން ކަރުނަ ފައިބަމުން ދިޔައެވެ.

“ވަރަށް ބޮޑަށް ސޮރީ. އަހަރެން ހީއެއްނުކުރަން އަހަރެންގެ ބައްޕަގެ ސަބަބުން ސަމާއަށް މިވަރު ވާނެކަމަކަށް! ސަމާގެ ހާލު އިތުރަށް ދަނެނުގަނެވުނީމަ ވަރަށް ދެރަވެއްޖެ!. އަހަރެންގެ ބައްޕައަކަށް ދުވަހަކުވެސް އަހެރެން މާފެއް ނުކުރާނަން!”

“އަދި އެއް ވާހަކަ ބުނަންތަ! އަހަރެންގެ ބައްޕަ އެކަނި ހުރިހާ ކަމެއް ކުރީވެސް. އަހަރެންގެ މަންމައާއި އަހަންނަކަށް އިންފޯމް އެއް ނުކުރޭ. ބައްޕަ އަހަރެން ގާތުގައި ފޭކް ޖައްސާށޭ ބުންޏަސް، އޯލް މައި ފީލިންގްސް ވާ އެންޑް އިސް ސްޓިލް ރިއަލް ސަމާއާ ދޭތެރޭ. މިވާހަކަ ހީއެއްނުވޭ ބޮޑުދައިތަ ސަމާ ގާތު ބުނިހެނެއް. އަހަރެން އެދުވަހު ސަމާ ހޭނެތުނީމަ ހާލު ބަލަންވެގެން ގުޅިން. އެކަމަކު އެކަކުވެސް ފޯނެއް ނުނަގާ. މިވާހަކަ ބާއްވަމާ. ސަމާގެ ސުވާލުގެ ޖަވާބަކީ… ޔެސް އަހަރެން މެރީ ކުރާނަން. އޭރުން އަހަންނަށް ސަމާއާ ދޭތެރޭ އޮތް ލޯބި އިތުރަށް ދިރުވަން މަސައްކަތް ކުރެވޭނީ..” ވާހަކަ އިތުރަށް ކުރިއަށް ގެންދަމުން ބުންޏެވެ.

އަހަރެން ހުރީ އުފަލުންނެވެ. އަދި ހިތަށް އެރިއެވެ. އެހެންވީމަ މި ވޭތުވެދިޔަ ދުވަސްތަކުގަ އޭނަ އަހަރެން މަތިންނެއް ހަނދާން ނައްތައެއްނުލާތާ އެވެ. ޚިޔާލުގައި އިންދާ އަބްޔާޒު ގޮވާލިއެވެ. ސައިތަށި ހިހޫވާ ވާހަކަބުންޏެވެ.

ސައިބޮއި ނިމިގެން އަބްޔާޒުގެ ކާރުގައި އަހަރުމެން މިސްރާބުޖެހީ އަހަރެންގެ ގެއަށެވެ. އާއިލާއަށް މި އުފާވެރި ޚަބަރު ދިނުމަށެވެ. އޭރު އަހަރެންގެ ރެގިއުލާ ޗެކަޕެއް ހަދަންވެގެން ޑޮކްޓަރ ގޮސް އިނެވެ. ޑޮކްޓަރު ފެނުމުން އަވަހަށް އަހަރެން ބުނީމެވެ. “ޑޮކްޓަރ، ތެންކް ޔޫ އަހަންނަށް ވިސްނާދިނީމަ. ލޯބި އެއީ ފަނާވާ އެއްޗެއް ނޫންކަން މިއަދު އަހަންނަށް އެނގިއްޖެ. އަހަރެމެން ދެމީހުން މިތިބީ މިކައިވެނި ކުރަން ތައްޔާރަށް”.

ގޭގެ މީހުން ތިބީ އުފަލުންނެވެ. މާދަމާ ބައްދަލު ވާނެކަމަށް ބުނެފައި އަބްޔާޒު މިސްރާބުޖެހީ އޭނާގެ ގެއާ ދިމަލަށެވެ. ގެއަށް ދިޔައިރު އޭނަގެ މައިންބަފައިން ތިބީ އޭނަގެ އިންތިޒާރުގައެވެ. ކުއްލިއަކަށް އޭނަ ނިކުމެގެން ދިޔައިމެވެ.

“މަންމަމެން އެއްޗެކޭ ބުނުމުގެ ކުރިން އަހަރެން ބޭނުން އެއްޗެކޭ ބުންނަން. އަހަރެން ބޭނުން ސަމާއާ ވީހާވެސް އަވަހަށް ކައިވެނި ކުރަން. އެއީ އޭނަގެ ލައިފް ސޭވް ވާނެގޮތް. އަދި އެއްވާހަކަ ބުނަންތަ. އަހަރެން އަދިވެސް ސަމާދެކެ ލޯބިވޭ. އަހަރެން އެއްވެސް ވަރަކަށް ފޭކެއް ނުކުރަން. މިއޮތީ ސަމާގެ ރިޕޯޓުގެ ފޮޓޯއެއް.” މިހެން ބުނެފައި އަބްޔާޒު ނަގާފަ އިން ސަމާގެ ރިޕޯޓުގެ ފޮޓޯއެއް އޭނަގެ މައިންބަފައިންނަށް ދެއްކިއެވެ. އެމީހުންނަށްވެސް ލިބުނީ ޝޮކެކެވެ.

“އަބްޔާޒު ސަމާއަށް ގުޅާފަ ބުނޭ އަހަރެމެންވެސް ތި ކައިވެންޏާ ރުހި ގަބޫލޭ!” އަބްޔާޒްގެ މަންމަ މިހެން ބުނުމުން އަބްޔާޒަށް ހީވީ ދުނިޔޭގެ ހުރިހައި އުފަލެއް އެއްފަހަރާ ލިބުނުހެންނެވެ. އުފަލުން އޭނަގެ މަންމަގެ ގައިގަ ބައްދާލެވުނުވެ. އޭރު ޖިނާ އެމީހުންގެ ވާހަކަ އަޑުއަހަން ދޮރުކައިރީގައި ހުއްޓެވެ.

އަބްޔާޒު ޖިނާއަށް ގޮވާލުމުން އޭނާ އެހިއެވެ. “އަހަރެންގެ ބެސްޓް ފްރެންޑު އަހަރަންގެ ފަހަރިއަށް ވަނީ ހެއްޔެވެ؟” އަބްޔާޒު އާނއެކޭ ބުނުމުން ޖިނާއަށް ވީނުވީ ގޮތެއް ނޭނގެއެވެ. އޭރު ސަމާއަށް ޖިނާއަކީ އަބްޔާޒުގެ އެއްބަނޑު އެއްބަފާ ކޮއްކޮ ކަމެއް ނޭނގެއެވެ.

ނުނިމޭ

ލިޔުންތެރިޔާގެ ފުރަމަލަ

އާމިނަތު އިމްޝާ އަޙްމަދު
އާމިނަތު އިމްޝާ އަޙްމަދު
މުނިފޫހިފިލުވުމުގެ ޚަބަރުތަކުގެ އިތުރުން ވައްޓަފާޅިއާއި ގުޅުންހުރި ލިޔުންތައް އިމްޝާ ކަވަރު ކުރާނެ އެވެ.

ގުޅުންހުރި ލިޔުން: